Гэтага дня Вася чакаў даўно. Сёння хлопчык з бацькамі паедзе ў суніцы.
Да лесу даехалі праз пятнаццаць мінут. Мясціна была надзвычай маляўнічая. Уздоўж невялікай рэчкі расцягнулася вёска. З аднаго боку зелянеў бярозавы гай, а з другога – рос рэдкі сасоннік.
Пайшлі ў лес. Хутка трапілася сунічная палянка. Вася адразу пачаў збіраць чырвоныя, як жар, ягады ў свой паўлітровы слоік.
Суніцы раслі палянкамі. Давялося пакружыць па лесе. Стаміўся хлопчык, прысеў на пянёк. Адпачыў і зноў за работу ўзяўся.
Апоўдні выбраліся з лесу. Васілёк вельмі радаваўся. Ён, як дарослы, будзе ісці па горадзе з поўным слоікам духмяных суніц. Сам назбіраў!
На лаўцы каля іх пад’езда сядзелі суседкі.
– Малайчына, Васілёк, – пахваліла бабка Дар’я і ўздыхнула: – А я ўжо даўно не каштавала суніц.
Вася ведаў, што бабка Дар’я жыве адна. Ён прыпыніўся, зірнуў на слоік з суніцамі і сказаў:
– Бабуля, вазьміце, калі ласка, ягады.
Жанчына разгубілася, а хлопчык падаў ёй слоік і хуценька шмыгнуў у пад’езд.
(152 словы)
(Паводле М. Слівы)
Похожие статьи:
Аляксей Якімовіч → Аляксей Якімовіч - Падзяка
Сяргей Грахоўскі → Сяргей Грахоўскі - Сунічкі
Уладзімір Ягоўдзік → Уладзімір Ягоўдзік - Суніцы
Казімір Камейша → Казімір Камейша - Суніцы
Пераказы, дыктанты → Суніцы паспелі
