Маленькая палянка ў гушчары абгароджана старым парканам, і над ёй узняўся вялізны і стройны дуб. Гонкае і роўнае, як струна, дрэва выцягнулася ў вышыню, каб зялёнай верхавінай зірнуць на ваколіцы.
Не менш як тром рослым мужчынам трэба ўзяцца за рукі, каб абхапіць яго стан. Каля трыццаці метраў увысь цягнецца гонкі ствол без адзінага сучка і дупла, а потым раскідваецца пяццю доўгімі і моцнымі сукамі, утвараючы вялікую зялёную шапку. Ад гэтых сукоў да верхавіны яшчэ з дзесятак метраў. Калі б узабрацца на верхавіну, перад вачыма адкрылася б цудоўная панарама Палесся.
Як вызначылі спецыялісты, дубу за шэсцьсот гадоў. Яшчэ літоўскія князі палявалі ў гэтых мясцінах на зуброў і мядзведзяў, а малады дуб ужо шумеў ярка-зялёным веццем.
Шмат бачыў дуб на сваім вяку. Бушавалі суровыя навальніцы над ім, змяняліся часы і падзеі, але жыла родная зямля з яе свабодалюбівым народам, непакорным, прагным да волі і жыцця, і дуб як бы ўвасобіў гэтую магутнасць і непакорнасць сваёй зямлі.
(154 словы)
Паводле Т. Хадкевіча
Похожие статьи:
Казкі Жыцця → Якуб Колас - Як птушкі дуб ратавалі
Анатоль Бутэвіч → Анатоль Бутэвіч - Дуб-заступнік
Пераказы, дыктанты → Цар-дуб
Ядвігін Ш → Ядвігін Ш. - Дуб-дзядуля - ГДЗ
Ядвігін Ш → Ядвігін Ш. - Дуб-дзядуля
