Увага!!! Невялікія апавяданні і вершы пададзены ў поўным варыянце.

Сімплака

Сімплака (грэч. symphloke — спляценне), або спляценне, — адзін з відаў сінтаксічнага паралелізму, адначасовае ўжыванне ў вершы анафар і эпіфар або паўтораў якіх-небудзь слоў ці словазлучэнняў у сярэдзіне вершаваных радкоў. Вось прыклады сімплакі з народнай паэзіі:

Сонейка! Ляцелі гусі з Белае Русі. Сонейка!
Сонейка! Яны ляцелі, усё й гаварылі. Сонейка!
Сонейка! Дзе мы ляталі, дзе мы бывалі. Сонейка!
Сонейка! Такога дзіва мы не відалі. Сонейка!
Сонейка! Як у крывічах пасярод сяла. Сонейка!
Сонейка! Пасярод сяла студня віна. Сонейка!
(Народная песня)

Сядзем, татка, паабедаем з табою,
Паабедаўшы, падзелімся з табою.
Табе, татка, новая хатка, каморка,
А мне, татка, куфар адзежкі, кароўка.
Табе, татка, новая клетка і тачок,
А мне, татка, соценьку грошай, катушок.
(Народная песня)

Адначасовае ўжыванне анафар і эпіфар (побач з іншымі стылістычнымі фігурамі) надало адметны выгляд вершу Кастуся Цвіркі «Такія сэрцы ў нас», дапамагло выявіць глыбока патрыятычную ідэю твора:

Такія, мусіць, косці ў нас —
Нам у пуху не спіцца,
Такія, мусіць, ногі ў нас —
Нідзе нам не сядзіцца,
Такія, мусіць, рукі ў нас —
Ніяк ім не стаміцца.

Крыніцы артыкулаў:

Рагойша В. П. Літаратуразнаўчы слоўнік: тэрміны i паняцці: для школьнікаў i абітурыентаў – Мінск: Народная асвета, 2009. – 303 с.
Рагойша В. П. Паэтычны слоўнік. – 3-е выд. – Мінск: Беларуская навука, 2004. – 576 с.
Слоўнік лінгвастылістычных і тэксталагічных тэрмінаў. Складальнікі: Абабурка М. В., Казімірская Т. А, Саўчанка В. М. – Магілёў: УА «МДУ імя А. А. Куляшова», 2012. – 284 с.

Тэорыя літаратуры: дапаможнік для студэнтаў філалагічных спецыяльнасцей ВНУ / В.І. Яцухна; Міністэрства адукацыі Рэспублікі Беларусь, Гомельскі дзяржаўны універсітэт імя Ф. Скарыны. – Гомель: ГДУ імя Ф. Скарыны», 2006. – 279 с.