Увага!!! Невялікія апавяданні і вершы пададзены ў поўным варыянце.

Дэталь мастацкая

   Дэталь мастацкая (франц. detaІl – падрабязнасць) – такая падрабязнасць літаратурнага твора, якая з асаблівай сілаю абуджае ўяўленне і творчую думку чытача, нясе значную ідэйна-эмацыянальную і сэнсавую нагрузку. Такімі могуць быць асобныя падрабязнасці пейзажу, партрэта, побыту, маўлення і дзеяння персанажа і гэтак далей. Па словах К. Паустоўскага, мастацкая дэталь "знаходзіцца ў адным шэрагу з удалым вобразам".
   Антон Чэхаў у лісце да брата пісаў: "У цябе выйдзе месячная ноч, калі ты напішаш, што на грэблі каля млына яскравай зорачкай паблісквала шкельца ад разбітай пляшкі і пакаціўся шарам чорны цень сабакі ці воўка і г. д. ".
   Майстрамі мастацкай дэталі з'яўляюцца Якуб Колас, Максім Гарэцкі, Іван Мележ, Янка Брыль, Васіль Быкаў, Іван Пташнікаў, Анатоль Кудравец, Алесь Жук, Генрых Далідовіч і інш.
   Часам мастацкая дэталь лейтматывам праходзіць праз увесь твор, вызначаючы нават ягоную назву ("На ростанях" Якуба Коласа, "Плач перапёлкі" Івана Чыгрынава, "Адзін лапаць, адзін чунь" Міхася Стральцова і іншыя).

Крыніцы артыкулаў:

Рагойша В. П. Літаратуразнаўчы слоўнік: тэрміны i паняцці: для школьнікаў i абітурыентаў – Мінск: Народная асвета, 2009. – 303 с.
Рагойша В. П. Паэтычны слоўнік. – 3-е выд. – Мінск: Беларуская навука, 2004. – 576 с.
Слоўнік лінгвастылістычных і тэксталагічных тэрмінаў. Складальнікі: Абабурка М. В., Казімірская Т. А, Саўчанка В. М. – Магілёў: УА «МДУ імя А. А. Куляшова», 2012. – 284 с.

Тэорыя літаратуры: дапаможнік для студэнтаў філалагічных спецыяльнасцей ВНУ / В.І. Яцухна; Міністэрства адукацыі Рэспублікі Беларусь, Гомельскі дзяржаўны універсітэт імя Ф. Скарыны. – Гомель: ГДУ імя Ф. Скарыны», 2006. – 279 с.