Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Помнікі студэнтам

   У розных гарадах свету ёсць помнікі і скульптурныя кампазіцыі, прысвечаныя студэнтам. Апошнім часам і ў Беларусі з’явілася некалькі такіх помнікаў.
   Напрыклад, студэнты Беларускага дзяржаўнага ўніверсітэта інфарматыкі і радыёэлектронікі паставілі помнік самім сабе на ўласныя грошы. Малады чалавек з бронзы "вучыцца" на факультэце камп’ютарных сістэм і сетак. Юнак з ноўтбукам у руках і рукзаком за плячыма ўпэўнена глядзіць наперад – такім убачыў сучаснага студэнта-праграміста мінскі скульптар Дзмітрый Аганаў. У бронзе ўвасоблены вобраз, прыдуманы самімі студэнтамі. Гэта крэатыўны малады чалавек, які імкнецца да ведаў, мае пачуццё гумару, не абцяжараны лішняй вагой і мускулатурай.
   Бронзавы студэнт, які нагадвае Францыска Скарыну ў маладыя гады, стаіць каля галоўнага корпуса Беларускага дзяржаўнага эканамічнага ўніверсітэта. Статуя ўстаноўлена ў гонар васьмідзесяцігоддзя гэтай установы адукацыі. Скульптар Павел Лук, стваральнік помніка, узяў за аснову вобраз аднаго з самых вядомых студэнтаў Беларусі, славутага дзеяча эпохі Адраджэння. У руках у "маладога Скарыны" – кніга і старажытны скрутак, што сімвалізуюць перадачу ведаў ад старэйшага пакалення нашчадкам. "Веды – сіла", – гаворыць надпіс на пастаменце статуі, нагадваючы беларускім студэнтам пра перавагі атрымання вышэйшай адукацыі.
   Свабодалюбівы і адухоўлены студэнт незалежных поглядаў – менавіта такія рысы беларускага студэнта вылучылі ў Полацкім дзяржаўным універсітэце, калі было прынята рашэнне паставіць помнік мясцоваму студэнту. Мінскі скульптар Аляксандр Прохараў стварыў вобраз сярэдневяковага шкаляра: на галаве ў яго трохвугольная шапка, у руках – кнігі, пяро і скрутак з гербам універсітэта. Двухметровы помнік студэнту з мінулага – гэта даніна памяці першай на тэрыторыі Беларусі вышэйшай навучальнай установе. Полацкі езуіцкі калегіум быў заснаваны ў тысяча пяцьсот васьмідзясятым годзе вялікім князем літоўскім Стэфанам Баторыем. У тысяча восемсот дванаццатым годзе яго пераўтварылі ў Полацкую езуіцкую акадэмію.
   Паставіўшы помнік студэнту, кіраўніцтва Полацкага дзяржаўнага ўніверсітэта задумалася: усё ж большасць студэнтаў ва ўніверсітэце і ў Беларусі – дзяўчаты. Значыць, трэба ўганараваць і іх. Скульптурная кампазіцыя "Студэнтка дваццаць першага стагоддзя", створаная Леанідам Мінкевічам, упрыгожыла фае галоўнага корпуса Полацкага дзяржаўнага ўніверсітэта, што знаходзіцца ў Наваполацку. На лаву "прысела" сімпатычная дзяўчына ў джынсах і басаножках на высокіх абцасах. У адрозненне ад бронзавага шкаляра, размешчанага на другім беразе Дзвіны, дзяўчына дэманструе характар, звычкі і інтарэсы сучасных прадстаўніц прыгожай паловы. Адкрытая кніга і мабільны тэлефон у руцэ сімвалізуюць імкненне спасцігаць новае і заўсёды быць на сувязі.
   У Гомельскім дзяржаўным універсітэце імя Францыска Скарыны таксама ёсць помнік студэнтцы. Ён быў урачыста адкрыты дваццаць пятага студзеня дзве тысячы дзясятага года, у Таццянін дзень, які традыцыйна лічыцца святам студэнтаў. Відаць, прыгожую бронзавую студэнтку таксама завуць Таццянай. Ініцыятарамі ўстаноўкі скульптуры сталі самі студэнты. Быў аб’яўлены конкурс эскізаў. Сярод іх былі работы "Студэнт з бутэрбродам", "Студэнцкае сяброўства" і іншыя. Конкурсныя работы выстаўляліся ў холе ўніверсітэта для азнаямлення, кожны мог прагаласаваць за той ці іншы эскіз. Перамагла работа Яны Канавалавай, творы якой упрыгожваюць не толькі Гомель. На каленях бронзавай студэнткі ляжыць разгорнутая кніга, у левай руцэ дзяўчына трымае яблык, а побач знаходзіцца яе сумка. Відаць, у конкурсе перамог менавіта жаночы вобраз таму, што большасць студэнтаў універсітэта – хлопцы.
(462 словы)

Паводле А. Лешык, Д. Дзежыца.