Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Полацкая зямля

   Полацк... Гэта слова як рэха слаўнай гісторыі нашай Радзімы. Назва горада трывала ўваходзіць у нашу свядомасць яшчэ з ранняга дзяцінства.
   Полацк – адзін з самых старажытных гарадоў усходніх славян. Ён равеснік Кіева і Ноўгарада і ўпершыню ўпамінаецца ў старажытным летапісе «Аповесць мінулых часоў».
   Горад ляжаў на магістралі, якая звязвала Захад з Усходам, на гандлёвым шляху «з варагаў у грэкі» – з Прыбалтыкі да Чорнага мора. Праз Полацкую зямлю праходзіў гандлёвы шлях у Заходнюю Еўропу па Заходняй Дзвіне. Такое геаграфічнае становішча садзейнічала далейшаму росту і гаспадарчаму развіццю горада.
   Полацкая зямля мае своеасаблівую культуру, багатую, слаўную гісторыю. Давайце ж глянем на тое, што захавалася і збераглося да сённяшняга дня.
   Пачатак манументальнага дойлідства Беларусі і найвышэйшае яго дасягненне – Сафійскі сабор. Сёння тут размешчана архітэктурная экспазіцыя, канцэртная зала сімфанічнай і камернай музыкі, устаноўлены арган.
   Паўночным фарпостам Полацка з’яўляўся Спаса-Ефрасіннеўскі манастыр. Гэта месца жыцця і дзейнасці славутай асветніцы Ефрасінні Полацкай, перадавой, адукаванай жанчыны свайго часу. Яна перапісвала кнігі, пісала летапісы і арыгінальныя творы. Заснавала жаночы і мужчынскі манастыры, якія сталі цэнтрам асветы ў Полацкім княстве.
   Пройдземся ўздоўж правага берага Дзвіны. Мажліва, недзе тут стаяў дом купца Лукі Скарыны. У яго сям’і нарадзіўся будучы беларускі першадрукар, вучоны, асветнік і культурны дзеяч, перакладчык, пісьменнік і мастак-графік эпохі Адраджэння Францыск Скарына. Вядома, што рознабаковая яго дзейнасць насіла прагрэсіўны характар, адыграла значную ролю ў духоўным жыцці беларускага народа і аказала значны ўплыў на развіццё нашай культуры. У 1974 годзе ў горадзе пастаўлены помнік знакамітаму палачаніну.
   Былая Богаяўленская царква мужчынскага манастыра сёння досыць вядомае месца. Тут знаходзіцца Полацкая карцінная галерэя. У брацкай школе манастыра некаторы час выкладаў Сімяон Полацкі – беларускі і рускі грамадскі дзеяч, педагог, пісьменнік і публіцыст.
   Тут ёсць вал Івана Грознага – частка ўмацавання Ніжняга замка.
   У чэрвені 1705 года ў Полацку жыў Пётр I, які прыязджаў сюды для кіраўніцтва рускімі войскамі ў Паўночнай вайне са шведамі.
   У перыяд вайны 1812 года Полаччына стала арэнай жорсткіх баёў з французскімі захопнікамі. Пры вызваленні горада ад акупантаў шмат рускіх і французскіх воінаў загінула на мосце праз раку Палату. З таго часу мост называюць Чырвоным.
   Цяжкім выпрабаваннем для Полацка стала Вялікая Айчынная вайна. Горад абараняла 174-я стралковая дывізія, воіны стаялі насмерць. Рух праціўніка на ўсход быў прыпынены больш як на два тыдні. Фашысты не чакалі такога супраціўлення. Яны так і не ўзялі Полацк з ходу, а вымушаны былі абысці яго з флангаў. Многія палачане мужна змагаліся ў партызанскіх атрадах, у падполлі.
   Страшную карціну ўяўляў горад пасля вызвалення. Было разбурана жыллё, знішчаны прамысловыя прадпрыемствы. Яшчэ на захадзе грымелі баі, а ў горадзе ўжо пачалося аднаўленне.
   Кожны крок па вуліцах старажытнага горада – гэта дотык да славутай гісторыі нашай краіны.
   Зараз Полацк – буйны прамысловы і культурны цэнтр рэспублікі. Але найвялікшы гонар палачан, безумоўна, даўніна. Прайсціся па месцах, дзе з вамі гаворыць сівая старажытнасць, цікава не толькі гасцям горада, але і яго жыхарам.
(458 слоў)

Паводле М. Барэйшы.

Похожие статьи:

ПераказыБацька гарадоў беларускіх

ПераказыРадзіма душы

ПераказыСкрозь стагоддзі

ПераказыПолацк

ПераказыМы родам адсюль