Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Падарунак

   Вавёрачку прынёс бацька з лесу. Ён расказаў, як лесарубы павалілі тоўстую асіну і раптам пачулі глухі галасок, што ішоў з дрэва. Расшырылі сякерай дупло і дасталі адтуль маленькае шэра-карычневае стварэнне з круглымі, як зярняты, вочкамі і закручаным хвосцікам.
   Вавёрачка адразу стала свойскай: лёгка ішла на рукі, брала з далоні семкі, арэшкі, хлеб. Іван браў вавёрачку ў школу. Яна ціха сядзела ў кішэні яго пінжака ці спала там у цяпле.
   За лета вавёрачка вырасла, поўсць яе распушылася, стала бура-серабрыстая, бліскучая.
   Пад Іванавым акном расла разгалістая яблыня. Іван расчыняў акно, і вавёрачка лёгка пераскоквала з падаконніка на галінку, з галінкі – у сад. Але варта было хлопчыку ціхенька пасвістаць – і яна зноў ля акна.
   З часам вавёрачка пачала хавацца. Ніхто не ведаў яе схованкі. Абшукалі ўвесь дом, але не знайшлі яе.
   Аднойчы маці ўбачыла ў садзе ўжо дзвюх вавёрачак. Яны гулялі, скакалі адна за адной, весяліліся. А праз дзень вавёрачка дамоў не вярнулася. Іван пагараваў і змірыўся.
   Надышлі халады, трэба было цёпла апранацца. Іван успомніў пра новае паліто, што вісела за печчу. Сунуў руку ў рукаў, а адтуль, як з мяшэчка, пасыпаліся арэхі, цукеркі, сухарыкі.
   – Гэта вавёрачка зрабіла мне падарунак! – усклікнуў хлопчык.
   Надзеў Іван паліто, павярнуўся перад маці. На спіне ў паліто была прагрызена дзірка велічынёю з яблык. А ў рукаве ляжалі вата, саломінкі, ніткі – сапраўднае ўтульнае гняздзечка. Вось куды хавалася вавёрачка!
(220 слоў)

Паводле А. Кудраўца

 

Похожие статьи:

Мікола ЧарняўскіМікола Чарняўскі - Лясная гаспадыня

Пераказы, дыктантыВыпадак у лесе

Васіль ВіткаВасіль Вітка - Вавёрчына гора

Пераказы, дыктантыВернісаж для мамы

Пераказы, дыктантыПадарунак (Паводле В. Хомчанкі)