Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Янка Купала - Спадчына

Ад прадзедаў спакон вякоў  
Мне засталася спадчына;  
Паміж сваіх і чужакоў  
Яна мне ласкай матчынай.
 
Аб ёй мне баюць казкі-сны  
Вясеннія праталіны,  
І лесу шэлест верасны,  
І ў полі дуб апалены.
 
Аб ёй мне будзіць успамін  
На ліпе бусел клёкатам  
І той стары амшалы тын,  
Што лёг ля вёсак покатам;
 
І тое нуднае ягнят  
Бляянне-зоў на пасьбішчы,  
І крык вароніных грамад  
На могілкавым кладзьбішчы.
 
І ў белы дзень і ў чорну ноч  
Я ўсцяж раблю агледзіны,  
Ці гэты скарб не збрыў дзе проч,  
Ці трутнем ён не з’едзены.
 
Нашу яго ў жывой душы,  
Як вечны светач-полымя,  
Што сярод цемры і глушы  
Мне свеціць між вандоламі.
 
Жыве з ім дум маіх сям’я  
І сніць з ім сны нязводныя.  
Завецца ж спадчына мая  
Ўсяго Старонкай Роднаю.

 

Похожие статьи:

Янка КупалаЯнка Купала - Пясняр беларускага народа

Алесь РазанаўАлесь Разанаў - Спадчына

ПераказыСпадчына

Янка КупалаТэма народнага жыцця і любоў да Радзімы ў творчасці Янкі Купалы

ПераказыСпадчына