Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Нахлебніца

   Я сядзеў на мяккай купіне і палуднаваў.
   Пасля доўгага блукання па асеннім лесе елася на свежым паветры вельмі апетытна.
   Непадалёк ад мяне ўвесь гэты час нешта непакоіўся дзяцел. Пакрычыць птах, пакрычыць і супакоіцца. Хвіліну-другую ціха, потым зноў за сваё.
   Я даеў яблык і асцярожна падаўся на гукі.
   Уперадзе адкрылася прасторная высечка. Дзяцел крычаў дзесьці на дрэве. Але дзе, не было бачна.
   А вось і ён. З самай вершаліны высокай блакітнай елкі дзяцел спускаўся ўніз, трымаючы ў дзюбе вялікую яловую шышку.
   Калі дзяцел сеў на пень-абломыш, з-за елачкі да яго кінулася вавёрка. Птушка кінула шышку і з крыкам падалася назад на елку. Вавёрка схапіла шышку, ускочыла на шырокі пень побач, села слупком і таропка пачала яе вылузваць.
   Пакуль вавёрка з шышкай распраўлялася, дзяцел узрушана крычаў на дрэве.
   Але вось яна саскочыла з пня і знікла ў траве. Дзяцел зараз жа супакоіўся, адарваў новую шышку і накіраваўся з ёю да сваёй «кузні». Варта яму было толькі апусціцца на пень, як зноў з’явілася вавёрка. I ўсё паўтарылася нанава.
   «Чаму ж гэты хітры звярок так недалікатна карыстаецца паслугамі птушкі? – падумаў я. – Шышак жа на дрэвах шмат мелася. Хіба ж ёй, такой спрытнай, самой цяжка ўскочыць на хвою?»
   Я стаў у бінокль уважліва назіраць за вавёркай і ў хуткім часе ўсё зразумеў. У звярка была паранена пярэдняя лапка. Магчыма, ястраб накінуўся ці куніца ноччу заспела ў гняздзе, ды толькі вавёрцы пашчасціла вырвацца ад драпежнікаў.
   Ціха, каб не патурбаваць лясных жыхароў, я падаўся з высечкі. Шышак шмат на дрэвах, усім хопіць. А тое, што вавёрка часова дзятла крыўдзіць, не бяда. Трэба ж і ёй неяк карміцца, пакуль лапка зажыве.

Похожие статьи:

Рыгор ІгнаценкаРыгор Ігнаценка - Дупляначка

Рыгор ІгнаценкаРыгор Ігнаценка - Грыбнік

Рыгор ІгнаценкаРыгор Ігнаценка - Ганарлівая птушка

Рыгор ІгнаценкаРыгор Ігнаценка - Вясна ідзе

Рыгор ІгнаценкаРыгор Ігнаценка - Ягады пад снегам