Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Маўклівая зязюля

   Не доўга спяваюць зязюлі. У канцы красавіка абрадуюць чалавека сваім першым «ку-ку», праспяваюць май ды чэрвень і змоўкнуць аж да наступнай вясны.
   Па-рознаму людзі тлумачаць гэту з’яву. Адны кажуць, што птушка каласком падавілася, другія – у ястраба ператварылася, і таму, маўляў, голас згубіла, трэція – пакінула лес.
   У ліпені, калі здараюцца ціхія надвячоркі, іншы раз берасцянка не ўтрымаецца і рассыпле дзе-небудзь у зялёным бары сваё звонкае срэбра, шэры дрозд заспявае. А часам нават дзе-небудзь у лазовым кусце і салавей цёхкне раз-другі. Абзавецца і, нібы спалохаўшыся свайго ўласнага голасу, зараз жа змоўкне.
   А вось спеву зязюлі, хоць дзень і ноч не вылазьце з лесу, не ў свой час не пачуеце. Вельмі строгая пяюха.
   Зачараваў мяне бярозавы гаёк. Не тое каб я ўпершыню ўбачыў яго, не. Вось ужо гадоў дзесяць я ў ім грыбы збіраю, і ўсялякі раз ён мяне чамусьці хвалюе. Чысценькі такі, светлы.
   Сяджу гэта я на купіне і гаем любуюся.
   Раптам паміж белых ствалоў прамільгнула нейкая буйная птушка і села на галінку. Шэрая ўся, хвост даўгаваты. Што ж гэта за птушка?
   Пасядзела нейкі час моўчкі і зноў паляцела. Да таго ж неяк ціха, нясмела. Праляцела яна некалькі метраў і зноў на галінку села. У мой бок запытальна пазірае. Чымсьці, відаць, я зацікавіў яе.
   – Дык гэта ж зязюля! – нарэшце пазнаў я.
   Птушка яшчэ некалькі разоў пераляцела з адной бярозкі на другую, увесь час пазіраючы ў мой бок. Нарэшце яна села на сухі сучок блізка да ствала і сцішылася.
   А што, калі кукукнуць, нагадаць птушцы аб нядаўнім вясёлым часе?
   Я склаў далоні і на ўвесь белы гаёк: ку-ку!
   Пачула яна і неяк спалохана скаланулася.
   Для яе гэта маё «ку-ку» было, відаць, недарэчным і нязвыклым. Не той час, значыць.
   Памарудзіла зязюля з хвіліну, потым сарвалася з месца, мільганула паміж белых ствалоў і знікла з вачэй.

Похожие статьи:

Рыгор ІгнаценкаРыгор Ігнаценка - Грыбнік

Рыгор ІгнаценкаРыгор Ігнаценка - Дупляначка

Рыгор ІгнаценкаРыгор Ігнаценка - Ганарлівая птушка

Рыгор ІгнаценкаРыгор Ігнаценка - Вясна ідзе

Рыгор ІгнаценкаРыгор Ігнаценка - Ягады пад снегам