Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Васіль Хомчанка - Наша лавачка

Увага!!! Поўны змест

   Мы з Толікам на двары паставілі лавачку. Добрую, са спінкаю. Як толькі зрабілі, паселі і сядзім. Добра сядзець у цяньку пад ліпаю. Колькі хочаш сядзі, каго хочаш запрашай пасядзець – лавачка наша.
   Вось так мы сядзім адны дзесяць хвілін, дваццаць.
   З дому выйшаў наш сусед дзед Андрэй. Убачыў лавачку, здзівіўся: нічога не было, а цяпер лавачка стаіць.
   Мы пасунуліся.
   – Калі ласка, – сказалі дзеду Андрэю. – Гэту лавачку мы зрабілі.
   Цяпер сядзім утрох. Дзед хваліць лавачку і нас малайцамі заве. Добра, кажа, у цяньку пасядзець.
   З трэцяга пад’езда выйшаў яшчэ адзін дзед.
   – Хадзі, Іван, пасядзі, – паклікаў дзед Андрэй.
   Падышоў дзед Іван і спытаўся:
   – Гэта ты, Андрэй, зрабіў лавачку?
   – Не, мы з Толікам, – пахваліўся я, – наша лавачка.
   Я ўстаў і даў месца дзеду Івану. Потым Толік саступіў месца бабулі, якая падышла да нас.
   Мы стаім, а два дзяды і бабуля сядзяць на нашай лавачцы.
   – Няхай пасядзяць, – сказалі мы. – Паспеем насядзецца.
   Пагулялі ў двары, пабегалі па вуліцы, вярнуліся, а на лавачцы сядзяць тры бабулі. Схадзілі ў кіно, паабедалі, выйшлі на двор – зноў лаўка занятая. Нейкія дзядзька і цётка з дзіцем селі. Так у той дзень мы і не дачакаліся, калі можна будзе пасядзець на сваёй лавачцы. I на другі, і на трэці дзень тое ж самае – сядзяць людзі на ёй, а нас убачаць – хваляць:
   – Малайцы, хлопцы. Такую добрую лавачку зрабілі.
   Кожнаму хочацца пасядзець на лавачцы, а яна ж невялікая, толькі на тры чалавекі.
   I рашылі мы зрабіць яшчэ адну лавачку, вялікую, каб усім хапіла месца...
   – Цюк! Цюк! – стукае наша сякера. Памагайце, малыя, мы робім другую лавачку.
   Большую, са спінкаю. I для старых, і для малых.