Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Энцыклапедыя

   Энцыклапедыя (ад гр. enkykliospaideia — кола ведаў) — навуковае ці навукова-папулярнае даведачнае выданне па ўсіх або пэўных галінах ведаў. Матэрыял у такіх выданнях звычайна размяшчаецца паводле алфавітнага, часам — паводле алфавітна-тэматычнага прынцыпу.
   Энцыклапедыі падзяляюцца на універсальныя, што ахопліваюць матэрыял па ўсіх галінах ведаў, рэгіянальныя, якія абмежаваны пэўнай тэрыторыяй, галіновыя, прысвечаныя пэўнай галіне ведаў, культуры ці народнай гаспадаркі, і персанальныя, куды ўваходзіць даведачны матэрыял пра нейкую адну выдатную асобу.
   Прыкладам універсальных энцыклапедый з'яўляюцца 12-томная "Беларуская Савецкая (1969-1975), а таксама 18-томная "Беларуская энцыклапедыя", выданне якой распачалося ў 1996 г. Прыклад рэгіянальнай энцыклапедыі - "Беларуская ССР: Кароткая энцыклапедыя" (т. 1-5, 1978-1982), дзе матэрыял пададзены паводле тэматычна-алфавітнага прынцыпу (даведкі пра літаратуру і літаратараў змешчаны ў 4 і 5 т.). Каштоўнейшыя звесткі па гісторыі і тэорыі літаратуры і мастацтва ўвайшлі ў галіновую "Энцыклапедыю літаратуры і мастацтва Беларусі" (т. 1-5, 1984-1987). З былых рэспублік СССР падобныя энцыклапедыі маюцца толькі ў Расіі (у прыватнасці, 9-томная "Краткая литературная энциклопедия", 1962-1978). "Украïнська літературна енциклопедія" ў 5-ці тамах з 1988 г. пачала выдавацца ў Кіеве (выйшлі пакуль што чатыры тамы). Услед за ўкраінскім "Шевченківським словником" (т. 1-2, 1976-1977) і рускай "Лермонтовской энциклопедией" (1981) пабачылі свет дзве персанальныя беларускія літаратурныя энцыклапедыі — "Янка Купала" (1986) і "Францыск Скарына і яго час" (1990). Мова шэрагу буйных беларускіх пісьменнікаў разгледжана ў грунтоўнай энцыклапедыі "Беларуская мова" (1994). Звесткі пра многіх дзеячаў культуры, у тым ліку пісьменнікаў, можна знайсці ў "Энцыклапедыі гісторыі Беларусі" (т. 1-6, 1993-2003), у аднатомных энцыклапедычных даведніках "Этнаграфія Беларусі" (1989), "Мысліцелі і асветнікі Беларусі: X-XIX стагоддзі" (1995), "Беларусь" (1995) і інш. Да энцыклапедый па паўнаце і спосабе падачы матэрыялу прымыкаюць спецыялізаваныя слоўнікі літаратуразнаўчых тэрмінаў.