Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Свяшчэнныя атрыбуты дзяржавы

   Кожная краіна, кожны народ адрозніваюцца ад іншых мовай, звычаямі, выглядам. Кожны народ і краіна маюць таксама свае адметныя знакі – гэта герб, сцяг і гімн. Дзяржаўныя герб, сцяг і гімн сімвалізуюць нашу незалежнасць, падкрэсліваюць стваральны дух і годнасць беларускага народа.
   Герб і сцяг лічацца найвышэйшымі сімваламі краіны. Яны азначаюць незалежнасць, суверэнітэт дзяржавы. Беларуская нацыянальная сімволіка прайшла доўгі і цярністы шлях, які злучыў даўнія стагоддзі і сённяшнія будні. У выніку ўсенароднага галасавання ў 1995 годзе былі прыняты Дзяржаўны герб і Дзяржаўны сцяг Рэспублікі Беларусь у сучасным выглядзе. Іх стварыў народны мастак Беларусі Міхаіл Савіцкі на аснове абнаўлення гістарычных сімвалаў.
   Герб Беларусі багаты па колькасці закладзеных у ім элементаў. Першае, на што зверне ўвагу кожны, – гэта зялёны контур тэрыторыі Рэспублікі Беларусь у залатых промнях сонца. Гэта сімволіка зразумела кожнаму: мы любім сваю Айчыну. Гэта наша зямля, нам чужой не трэба, але сваёй зямлі мы не аддадзім нікому! Контур краіны знаходзіцца ў сярэдзіне герба, утворанага вянком з каласоў, пераплеценых з аднаго боку ружовымі кветкамі канюшыны, з другога – блакітнымі кветкамі льну. Вянок спрадвеку выкарыстоўваўся як узнагарода пераможцу і ўвасабляў перамогу. Разам з тым гэта сімвал памяці і непарыўнай сувязі сучаснікаў з продкамі. Вянок жыта са старадаўніх часоў меў свяшчэнны сэнс для ўсіх славянскіх народаў. Славяне верылі, што сноп хлебных каласоў – сродак звароту да боскіх сіл з просьбай аб дараванні новага ўраджаю і росквіту.
   Унізе контура граніцы Рэспублікі Беларусі змешчаны зямны шар з узыходзячым сонцам і залатымі промнямі. Зямны шар – гэта знак таго, што Рэспубліка Беларусь успрымае ўсе народы Зямлі як раўнапраўных сяброў і партнёраў, гатова з імі сябраваць і гандляваць, абменьвацца вырабамі і ведамі. Яднанне Зямлі і Сонца – галоўны знак жыцця.
   У гербе знайшлі адбітак асноўныя нацыянальныя, духоўныя каштоўнасці беларусаў: грамадзянскае адзінства, праца, імкненне да міру і адначасова гатоўнасць пастаяць за сваю свабоду і незалежнасць.
   Дзяржаўны сцяг адлюстроўвае істотна важныя звесткі пра нашу краіну. Кожны грамадзянін павінен добра разумець мову беларускага сцяга, каб асэнсавана ганарыцца ім, як ганарацца сваім народам і яго слаўнай гісторыяй.
   Наш сцяг мае тры колеры: чырвоны, зялёны і белы. Чырвоны колер са старажытных часоў служыць знакам Сонца, сімвалізуе кроўныя сувязі, братэрства, барацьбу за справядлівую справу. Адначасова гэта знак шчаслівага жыцця. Зялёны колер – колер дабра, свабоды. Нездарма лічаць, што назва нашай краіны звязана з непахіснай воляй да свабоды. Белы колер – гэта колер маральнай чысціні і мудрасці. Сцяг Беларусі мае яшчэ адну важную дэталь – чырвоны народны ўзор.
   У цэнтры арнамента – ромб, элементы якога азначаюць вечнасць і рух. Сам ромб – гэта старадаўняя выява багіні Зямлі і Урадлівасці. Разам з тым ромб – гэта сімвал засеянага поля. Ён акружаны знакамі, якія сімвалізуюць ураджай, удачу і здзяйсненне добрых жаданняў.
   Такім чынам, сцяг і герб Рэспублікі Беларусь адлюстроўваюць гісторыю беларускага народа як часткі славянскай галіны ад самых старажытных часоў і да нашых дзён.
   Дзяржаўны герб і Дзяржаўны сцяг сумесна з Дзяржаўным гімнам утвараюць свяшчэнную трыяду нашай дзяржавы. Калі быў аб’яўлены конкурс на тэкст гімна, з больш чым чатырохсот варыянтаў быў выбраны тэкст на словы Міхася Клімковіча і Уладзіміра Карызны.
   З 2002 года Дзяржаўны гімн Рэспублікі Беларусь горда гучыць як напамін славы і мужнасці нашага народа.
(500 слоў)

Паводле Н. Балтрушэвіч.