Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Пачатак працоўнага дня

   Светлая паласа на ўсходзе высока паднялася над зямлёй. Заружавелі лёгкія воблакі. Вось-вось павінна было ўзысці сонца. Досвітак быў ціхі, толькі там-сям над комінамі віліся дымкі, узнімаючыся проста ў неба. Вёска ўжо не спала.
   Сяргей пакрочыў у бок калгаснага двара пакуль што бязлюднай вуліцай. Па дарозе яму сустрэліся толькі дзве жанчыны з поўнымі вёдрамі вады. Сяргей гатоў быў палічыць гэта за добрую прымету, але, убачыўшы перад сабой калодзеж, з усмешкай падумаў, што ад калодзежа ніхто не ідзе з пустымі вёдрамі. Ад гэтай усмешкі стала неяк весялей.
   На калгасным двары было большае ажыўленне. Даяркі ў белых, як у медсясцёр, халатах насілі ў малочную бітоны. Каля хлява ўжо сядзеў пастух з падпаскамі, чакаючы, калі даяркі ўправяцца са сваёй работай. Каля трактара, што стаяў сярод двара, завіхаўся малады хлопец у сінім камбінезоне. З гаража далятала вуркатанне матора – шафёр рыхтаваў машыну ў рэйс.
   Сяргей прывітаўся з людзьмі, перакінуўся з імі словам-другім. Не заўважыўшы асаблівых непаладак у іх рабоце, падаўся да канцылярыі.
(160 слоў)

Паводле У. Шахаўца.