Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Ластаўка

   Наташа прыйшла са школы і адразу з парога сказала:
   – Сёння ў нас вельмі важнае заданне. Трэба знайсці жанчыну – удзельніцу вайны і напісаць пра яе.
   – Сапраўды важнае заданне, – згадзіўся бацька, – я табе памагу знайсці.
   Яны селі на канапу, і тата пачаў расказваць.
   – У час вайны ў нашай часці служыла дзяўчына-санітар. Яе называлі Ластаўкай.
   Цяжкай была ў Ластаўкі служба. Асабліва калі ішоў бой. Параняць байца – яна перавяжа. А потым цягне яго ў больш зацішнае месца. Вакол міны і снарады рвуцца, кулі свішчуць. Выратуе аднаго, па другога трэба паўзці.
   Многа прайшла яна з намі баёў… Аднойчы мы вызвалілі ад фашыстаў вёску. Фашысты захацелі забраць вёску назад. Раненька пайшлі на нас танкі і пяхота. Пачаўся жорсткі бой. Ад варожага снарада загінуў увесь салдацкі разлік першай гарматы.
   Я стаў каля гэтай гарматы і пачаў страляць. Пачулі фашысты, што з гэтай гарматы радзей страляюць, і скіравалі на мяне два танкі. Першы танк я падбіў, а другі – не паспеў. Снарад разбіў маю гармату, а самога мяне цяжка параніла.
   І вось у гэты момант паяўляецца Ластаўка. Хапае яна гранату і кідаецца насустрач танку. Танк паўзе, ужо зусім блізка. Ластаўка ўсхопліваецца і кідае гранату пад самую гусеніцу. Выбух. Танк круціцца на месцы і спыняецца…
   Я страціў прытомнасць. Расплюшчыў вочы, бачу – вакол байцы стаяць, нада мною Ластаўка схілілася.
   А я ў бінтах, ляжу на насілках.
   «Ну вось і добра, – усміхаецца Ластаўка, – доўга жыць будзеш, таварыш лейтэнант».
   Бацька змоўк.
   Маўчала і Наташа. Нарэшце спытала:
   – А што далей было з Ластаўкай?
   – Дажыла да Перамогі. Вярнулася дамоў. Цяпер у школе дзяцей вучыць. Мы яе зараз пабачым.
   Тата ўстаў і павёў Наташу ў іншы пакой. Там, правяраючы вучнёўскія сшыткі, сядзела Наташына мама.
   – А вось і наша Ластаўка, – сказаў тата. – Тая самая, якая жыццё мне выратавала.

Паводле В. Хомчанкі

 

Похожие статьи:

Янка ЖурбаЯнка Журба - Ластаўкі

Міхась ЗарэмбаМіхась Зарэмба - Рыжая ластаўка - ГДЗ

Пераказы, дыктантыПершы аблёт

Артур ВольскіАртур Вольскі - Вярніся, ластаўка!..

Якуб КоласЯкуб Колас - Ластаўкі