Варыянт 1 (70 слоў)
З поўнымі кошыкамі грыбоў сябры вярталіся дамоў. Сярод дубоў стаяла маленькая альтанка. Яны прыселі адпачыць.
Памацнеў вецер. Неба зацягнулі шэрыя хмары. Трэба спяшацца ў вёску. Раптам хлапчукі заўважылі вавёрачку. Яна скокнула на дуб. У зубах гаспадынька трымала жолуд. Вавёрка схавала яго ў дупло, паскакала далей.
Дупло знаходзілася нізка над зямлёй. Хлопчыкі вырашылі дапамагчы звярку. Яны пачалі збіраць жалуды і складваць у кладоўку. Вось будзе сюрпрыз для вавёрачкі!
Варыянт 2 (120 слоў)
Дагараюць жоўтым золатам бярозы і клёны. Агрубела, пакрылася белым павуціннем трава. Не спяваюць птушкі. Але малых грыбнікоў гэта не засмучае. Весела пераклікаюцца хлопчыкі ў родным лесе.
З поўнымі кошыкамі грыбоў вярталіся сябры дамоў. Каля лесу стаяла невялікая альтанка, і яны прыселі адпачыць.
І тут хлопчыкі ўбачылі вавёрачку. Яна скокнула на дуб, схавала ў дупло жолуд і зноў уніз па камлі спусцілася.
Дупло знаходзілася нізка ад зямлі. Яно было прасторнае, як кладовачка. Засунуў Алесь у яго руку і намацаў жменьку жалудоў. Зімой не толькі арэхі, але і жалуды вавёрачцы спатрэбяцца.
Сябры вырашылі дапамагчы лясной прыгажуні і пачалі збіраць жалуды.
Дома хлопчыкі не сказалі, чаму затрымаліся ў лесе. Моўчкі перабіралі грыбы. Кожны ўяўляў, як радуецца жалудам у дупле вавёрачка.
Паводле Я. Галубовіча
Похожие статьи:
Віталь Вольскі → Віталь Вольскі - Вавёрка
Васіль Вітка → Васіль Вітка - Вавёрчына гора
Мікола Чарняўскі → Мікола Чарняўскі - Лясная гаспадыня
Пераказы, дыктанты → Выпадак у лесе
Артур Вольскі → Артур Вольскі - Вавёрка