Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Уладзімір Дубоўка - Дарога

Шляхі і гасцінцы ў прасторах радзімы!
Над вамі праходзяць і вёсны, і зімы,

і лета цвятлівае з сонцам гарачым,
і восень сцюдзёная з ветрам і плачам.

А людзі шляхамі-гасцінцамі едуць,
няма тут ніколі завялага следу...

Ні ў песні, ні ў казцы, ні ў кнізе найлепшай
няма асалоды для сэрца мілейшай,

якую прыносяць гасцінцы-дарогі
юнацкаму сэрцу і сэрцу старога.

Навокал бязмежныя нашы прасторы,
абапал прысады, палеткі, азёры.

Ад кветак улетку нам водар духмяны,
увосень віюцца кілімы туману,

зіма свой абрус беласнежны пасцеле
з найлепшай, са срэбнай, з пушыстай кудзелі.

Калісьці ў малецці шукалі мы, дзеці,
а дзе ж той канец для дарогі на свеце?

Хадзілі далёка маленькія ножкі.
Нідзе не канчалася тая дарожка...

У веку дарослым хадзілі нямала.
У нашых паходах чаго не бывала!

Чаго не пабачыла вока людское!
Сказаць аніяк немагчыма пра тое!

А толькі ў дарозе не бачылі краю,
за пройдзенай — з гакам — пачнецца другая.

А гэтага гаку прайсці немагчыма,
як нельга яго перагледзець вачыма...

 

Похожие статьи:

Уладзімір ДубоўкаУладзімір Дубоўка - Як сінячок да сонца лётаў

Уладзімір ДубоўкаУладзімір Дубоўка - Паляжам мы

Уладзімір ДубоўкаЛірыка Уладзіміра Дубоўкі

БиографииУладзімір Дубоўка

Уладзімір ДубоўкаУладзімір Дубоўка - Часіна ды з сокам рабіны...