Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Мікола Чарняўскі - Сонейка ўзышло

Быццам хто рассыпаў залацінкі
На траву, на дрэвы, на сяло.
Заблішчалі радасна расінкі –
Залатое сонейка ўзышло.

Зніклі цені ў патаемных сховах,
Разлілося далеччу святло.
Птушкі прабудзіліся ў дубровах –
Залатое сонейка ўзышло.

Ажыла прырода, заспявала,
Зноў адчуўшы ласку і цяпло.
Сінява яшчэ сінейшай стала –
Залатое сонейка ўзышло.

Бераг сонны ў хвалі акунуўся,
Цішыню як ветрыкам змяло.
Колас абраселы страпянуўся –
Залатое сонейка ўзышло.

Яблык бок яшчэ не загарэлы
Сонейку падставіў, каб пякло.
Лазнякі развесілі арэлі –
Залатое сонейка ўзышло.

Ад травінкі да сасны вячыстай
Ажыло ўсё раптам, расцвіло.
Ранак усміхнуўся прамяніста –
Залатое сонейка ўзышло.

 

Похожие статьи:

Мікола ЧарняўскіМікола Чарняўскі - «Акадэмія»... на колах

Мікола ЧарняўскіМікола Чарняўскі - Змайстравалі сані

Мікола ЧарняўскіМікола Чарняўскі - Ёлка

Міхась ЧарняўскіМіхась Чарняўскі - Вогнепаклоннікі

Мікола ЧарняўскіМікола Чарняўскі - Вясёлка над полем