Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Аляксей Якімовіч - Якая літара лепшая?

   Сустрэліся Варанянятка і Верабейка, сталі літары пісаць. "Ч", – напісаў Верабейка. А Варанянятка сказала:
   – Не падабаецца мне гэтая літара.
   – Якая літара табе падабаецца? – пытаецца Верабейка.
   – Мне падабаюцца тры літары "А", "Р", "К", – прамовіла Варанянятка. – Калі іх усе разам скласці, то вельмі прыгожа выходзіць. Вось паслухай: кар-р, кар-р ...
   – Табе зусім-зусім не падабаецца літара "Ч"? – засмуціўся верабейка.
   Варанянятка яму:
   – Зусім.
   Пакрыўдзіўся Верабейка. Ён так стараўся, калі пісаў літару "Ч", а яна не спадабалася.
   – Літара "Ч" мне нават спяваць дапамагае, – паціху прамовіў ён. – Паслухай: чык-чырык, чык-чырык ...
   – Дакажы, што яна лепшая, напрыклад, за літару "К", – сказала Варанянятка.
   – Не ведаю, як даказаць, – сказаў Верабейка.
   – Значыць, літара "Ч" горшая, – крыкнула Варанянятка.
   Бег Шпачок. Пачуў ён спрэчку.
   – Я дакажу, што літара "Ч" не горшае за літару "К", – сказаў.
   – Паспрабуй, – натапырыла пер’е Варанянятка.
   – Ёсць месяц, назва якога пачынаецца з літары "Ч", – сказаў Шпачок. – Калі б не было літары "Ч", то і не было б назвы гэтага месяца.
   – Гэты месяц называецца чэрвень, – крыкнуў Верабейка.
   – Ну і што, – прамовіла Варанянятка. – Ёсць ... Ёсць слова "Кавун", якое пачынаецца з літары "К". Ведаеце, які ён салодкі!
   Шпачок ў адказ:
   – Ёсць слова "чый". Яно пачынаецца з літары "Ч". Слова "кавун" складаецца з двух складоў, а слова "чый" складаецца з аднаго.
   Далей працягвае Шпачок:
   – З літары "Ч" пачынаецца слова "часопіс".
   – Калі б не было гэтага слова, то мы не ведалі б, што ёсць такія дзіцячыя часопісы, як "Вясёлка", "Бярозка". Цікавыя гэтыя часопісы? – падхапіў Верабейка.
   – Цікавыя, – пагадзілася Варанянятка. – Але ж у слова "часопіс" і літара "А" ўваходзіць. Не было б літары "А" – не было б гэтага слова.
   А Шпачок:
   – Не было б літары "Ч" – не было б гэтага слова.
   – Выходзіць, усе літары патрэбныя? – здзівілася Варанянятка.
   – Няма лепшай? Няма горшай?
   – Усе патрэбныя, – сказаў Шпачок. – Няма лепшай, няма горшай. Усе літары ў словах дружна, ладна жывуць.
   – І нам трэба дружна, ладна жыць! – усклікнуў Верабейка.
   – Дзякуй табе, Шпачок, за навуку, – сказала Варанянятка.
   – Да пабачэння. – крыкнуў Шпачок і пабег.
І Верабейка з Вараняняткам, спяваючы, няспешна пакрочылі па сцяжынцы. Цікавіцеся: як спявалі яны? Варанянятка каркала: "Кар-р, кар-р..." Верабейка чырыкаў: "Чык-чырык, чык-чырык..."

 

Похожие статьи:

Алесь ЯкімовічАлесь Якімовіч - Хітры воўк

Алесь ЯкімовічАлесь Якімовіч - Аўтамат

Алесь ЯкімовічАлесь Якімовіч - Байка пра казла

Алесь ЯкімовічАлесь Якімовіч - Аладкі

Алесь ЯкімовічАлесь Якімовіч - Вераб’ёвы госці