Чаму з маленства, з ураджэнства
Ў жыццёвы май
Не ўмеў, як маці, шанаваці
Цябе, мой край?
То ж я з тваёю ключавою
Святой вадой
Напіўся болю аб нядолі,
Бядзе людской.
То ж ты, мой хмуры, даў мне пануры
I ціхі гнеў,
А днём падчасным, так пекным, ясным,
Надзею грэў.
Твае ж курганы, лясы, паляны,
Дубкоў тых шум,
Палёў абшары, люд бедны, шары
Мне далі дум.
А дум тых многа...
Не, не ў бога
Ты даў мне іх.
I ты ж, як маці, наўчыў спяваці
Аб думах тых.
Я браў, не бачыў і не аддзячыў
Табе нічым,
Бо счараваны – цябе, укаханы,
Не знаў саўсім.
Цяпер хоць знаю, дык што ж параю
Ад позніх скрух?
Ў чужой краіне паволі гіне
За дзелам – дух.
Вазьмі ж хоць спевы, дум перапевы
Лясоў тваіх.
З тваёй глебы, з тваёга неба
Узяў я іх.
1911
Похожие статьи:
Пераказы, дыктанты → Свой край
Пераказы, дыктанты → Святло Радзімы
Васіль Зуёнак → Васіль Зуёнак - Будучыня
Пераказы, дыктанты → Мой край
Авяр’ян Дзеружынскі → Авяр’ян Дзеружынскі - Я спяваю, ты спявай!
