Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Алесь Бадак - Гасцінец для вожыка

   Ёсць шмат народных павер’яў і прыкмет. Напрыклад, гаспадароў хаты, паблізу якой буслы робяць сабе гняздо, чакае шчасце, а ў саму хату ніколі не стукне маланка.
   А пра гэтую прыкмету я ні ад кога не чуў, сам здагадаўся. Калі хочаш, запомні, а пасля правер: сустрэць вожыка – на радасць. І яшчэ не было ў мяне выпадку, каб прыкмета не спраўдзілася, таму што, і праўда, назіраць за вожыкам – адно задавальненне.
   Вось ён асцярожна вылез з-пад горкі сухога галля, прынюхаўся, ці не пахне паблізу лісам, і накіраваўся ў сваё штодзённае падарожжа па лесе. Тэп-тэп. Добра было б якога чарвячка знайсці. Тэп-тэп. А яшчэ лепш мышку злавіць. Тэп-тэп. А то і змяю. Тэп-тэп. А вось з лісой вельмі не хацелася б сустрэцца!
   Супраць ворагаў у вожыка адна зброя: калючкі.
   Скруціцца ў калючы клубок – ні галавы, ні лапак не відаць.
   Але ж я яму не вораг. Дастану з кішэні цукерку, разгарну і пакладу перад клубком, а сам адыдуся.
   Праз хвіліну-другую высунецца з клубка носік, а яшчэ праз некалькі хвілін вожык ужо ліжа гасцінец. Ну чым не радасць для мяне?!