Выдатны беларускі празаік Янка Брыль меў багатую дамашнюю бібліятэку, быў уважлівым і неабыякавым чытачом.
Чытаў Брыль шмат, выдатна ведаў еўрапейскія літаратуры. Калі паспяваў? Ды проста ні дня не мог пражыць без цікавай і карыснай кнігі. Здзіўляла, што на ўсё прачытанае меў свой водгук, які пакідаў у блакнотах, дзённіках, выказваў у лістах да аўтараў, у тэлефонных размовах з сябрамі па літаратуры. Многае з прачытанага трымаў у памяці: вобразы, дэталі, свежыя думкі, словы. Жыў кнігаю і выпрацаваў у сяброўстве з ёю выдатную культуру чытання.
Ён любіў свой народ, верыў у яго светлую будучыню і таму ў гэтай любові і веры бачыў сваіх нашчадкаў у сяброўстве з разумнай кнігай, вечнай крыніцай не толькі духоўных, але і матэрыяльных набыткаў. Праз свой багаты жыццёвы вопыт ён ведаў, што чалавек, адлучаны ад кнігі, мала на што здольны і мала каму цікавы.
(139 слоў)
Паводле В. Карамазава
