Найти на сайте: параметры поиска

Увага!!! Невялікія апавяданні і вершы пададзены ў поўным варыянце.



Максім Танк - Журавель і Чапля

На адным канцы балота
Была хата Жураўля,
На другім канцы балота
Чапля шэрая жыла.

Надакучыла сівому
Жыць самотна Жураўлю.
Блукаць каля буралому
Па балотнаму гніллю,

Слухаць жаб неўгамонны
Рогат, шум у трысніку,
Перагуды, перазвоны
Камароў у талаку.

Вось задумаў ажаніцца
Ды на Чаплі Журавель
І пайшоў да маладзіцы
Па імшарах, па дрыгве.

Ляпу-чапу, ляпу-чапу, –
Журавель ідзе-брыдзе,
Праз сем дзён прыйшоў да Чаплі
I гаворыць: – Добры дзень!

Ці не хочаш за мяне ты
Выйсці замуж? – А яна
Кажа: – Што ты, – кажа, – гэта
Сабе выдумаў сп’яна!

Непрыгожы, даўганогі, –
Лепш ідзі адкуль прыйшоў! –
I пабрыў сваёй дарогай
Сумны Журавель дамоў.

Ды адумалася Чапля,
Што дарма за Жураўля,
За балотнага суседа,
Яна замуж не пайшла.

Ляпу-чапу, ляпу-чапу, –
Ў хату Жураўля ідзе.
Праз сем дзён прыходзіць Чапля
I гаворыць: – Добры дзень!

Ці не возьмеш мяне ў хату? –
Журавель ёй кажа: – Не!
Дзе з такой, як ты, чубатай,
Паказацца ў свеце мне?

Шыя выгнута вужакай,
Хараства ні ў чым няма!
І убор твой аніякі,
I нягодная сама.

Калі Чапля з хаты выйшла,
Журавель пашкадаваў,
Што пакрыўдзіў яе лішне.
Што за жонку не узяў.

Ляпу-чапу, ляпу-чапу, –
Па дрыгве і па вадзе
Ізноў сватацца да Чаплі
Журавель ідзе-брыдзе...

I так ходзяць яны ў сваты
Цэлы свой птушыны век,
I стаяць іх воддаль хаты
Па канцах балот і рэк.

 

Похожие статьи:

Цётка (Алаіза Пашкевіч)Цётка - Журавель і чапля

Пераказы, дыктантыПершы вылет

БиографииМаксім Танк

Пераказы, дыктантыЖабяня і Чапля

Максім ТанкМаксім Танк - Люцыян Таполя. Ідэйны змест