Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

Электронныя версіі беларускіх кніг на сайце kniharnia.by, для дзетак chitaemdetyam.com

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Янка Золак - Мая Беларусь

Кнопка отправить на печать

Беларусь для мяне – мая родная маці,
Што ў залочаны восені цвет,
У сялянскай з лучынаю хаце
Спарадзіла мяне на свет.

Беларусь для мяне – гэта шчырая вера,
Гэта сэрца сыноўнага стук.
Беларусь для мяне – гэта звонкая лера
I цымбалаў раскацісты гук.

Беларусь для мяне – гэта белыя зімы
I вясновы бурлівы разліў;
Васількі у жытох гаманлівых,
Водар бэраў, антонавак, сліў.

Беларусь для мяне – гэта восень з кастрыцаю,
Верацёнаў гудзенне, красён перастук,
Кужаль, тканы матуляй, сястрыцаю,
Гэта – плёны ад працы мазолістых рук.

Беларусь для мяне – Каліноўскі, Скарына,
Багушэвіч, Купала і сотні такіх,
Каго гора-бяда не скарыла,
Хто ніколі не зрокся сваіх.

Беларусь для мяне – гэта слуцкія ткаллі,
Што прыгожыя ткуць паясы;
Гэта рэк і вазёраў срабрыстыя хвалі,
Белавежская пушча і Бранска лясы.

Беларусь для мяне – Сакавік Дваццаць Пяты
Пуцяводная зорка мая,
Случчакі, Вяліжане у бітвах зацятых
Ды імклівай «Пагоні» ваяк.

Беларусь для мяне – гэта спеўная лера
I крынічка, што з лесу бяжыць;
У свой край непахісная вера,
Што ён жыў і жыве й будзе жыць!

24 сакавіка 1983 г.



Крыніца: Золак Янка. Вятрыска з радзімай краіны: Зб. выбр. тв. / Уклад. і прадм. Л. Пранчак. – Мн.: БелАДІ, 1996 – 312 с.

Комментарии (0)

Нет комментариев. Ваш будет первым!