Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

Электронныя версіі беларускіх кніг на сайце kniharnia.by, для дзетак chitaemdetyam.com

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Уладзімір Караткевіч - Жабкі і Чарапаха

Кнопка отправить на печать

Увага!!! Поўны змест

   На беразе маленькага ляснога возера-балотца разгарлаліся, разышліся і наладзілі канцэрт жабы. Церушыў на іхнія галоўкі цёплы дожджык, свяціла праз яго сонца. Весела было жабкам – вось яны і спявалі.
   I тут прыплыла пратокай з такога самага суседняга балотца-возера вялікая балотная Чарапаха. Жыла яна адна, пачула вясёлыя спевы і вось прыплыла, вынырнула, напалову вылезла на бераг і ўся аж зморшчылася ад асалоды. Надта добра спявалі жабкі.
   – Жабкі, жабкі, добры дзень.
   – А ты што за цуда-юда? – спыталі жабкі.
   – Я Чарапаха.
   – Бачыць такое не бачылі, чуць гэткае не чулі. Значыць, не можа цябе быць.
   – Ды ёсць жа я, – сумна сказала Чарапаха. – I як жа вы добра спяваеце! Паўтарыце, калі ласка. Проста салаўі.
   – Можам, – сказалі ўлешчаныя жабкі.

– Ку-ма, кума
Бор-ршчык вар-рыла.


   – Выдатна, – сказала Чарапаха. – Выключна. Жабкі-жабкі, прыміце мяне ў свой хор.
   – А ты спяваць умееш?
   – Не. Я слухаць люблю.
   – Дык слухай. Здалёк. Ці прывядзі сястру, якая ўмее.
   – I яна не ўмее, – сумна сказала Чарапаха. – Мы, чарапахі, не ўмеем спяваць. Голасу нам не дадзена.
   – Дык нашто ты нам тады? – спыталі жабкі.
   – А слухаць вас хто будзе? Хваліць.
   – Нас і так усе чуюць. I ўсе хваляць.
   – Ну і я ціхенька сядзела б ды хваліла, – сказала добрая і разумная Чарапаха.
   – Дык ты, можа, яшчэ нешта ўмееш? – спытала Галоўная Жаба ў хоры, якая аж дзьмулася ад важнасці.
   – Плаваць умею. Ныраць.
   – Гэта й мы ўмеем. А скакаць умееш?
   – Не, – уздыхнула Чарапаха.
   – Нічога ты не ўмееш... А мы яшчэ нясём ікру. Жабурынне.
   – Я замест яе яйкі нясу, – сказала Чарапаха. – Вялікія.
   – Ф-фу, – сказала Галоўная, – яйкі... Ну, паспрабуй усё ж заспяваць.
   I Чарапаха зарыпела:

– Свеціць месячык з гары
На глыбокія віры.
На шчытах у чарапах
Сіняе святло гарыць.


   – Словы нішто сабе, – сказалі жабы, – але голас? Бр-р-р!
   – Дык я б вам – словы, а вы б – спявалі.
   – Словы ў нас не горшыя. Самі прыдумалі:

– Што вар-рыла, кум-ма, кум-ма?
Борш, бор-ршч, бур-ракі.


   – Добрыя словы, – сказала Чарапаха, – але галасы ў вас лепшыя.
   – I што гэта за «шчыты ў чарапах»? – спытала Галоўная Жаба.
   – А вось тое, што на мне.
   – Гэта карычневае? – усхваляваліся жабы. – Гэта брыдкае? Ну не. Мы вось такія прыгожыя. Зялёныя. Бліскучыя. Як лакіраваныя.
   – Жывыя, – сказала Чарапаха, – усе прыгожыя.
   – А чаму гэта брыда завецца шчытом? – спытала Маладзенькая Жабка.
   – Яна цвёрдая.
   – Няўжо-о? Во-ой! Быць не можа.
   Самая смелая з жабак падплыла асцярожна і дакранулася да панцыра лапкай.
   – Вой! Яна ж як жалезная!
   – Ну і што? – сказала Чарапаха.
   – Цвёрдая!.. Голасу не мае!
   – Усё роўна вы мне падабаецеся. Спяваеце прыгожа. Мне адной сумна.
   Але жабы ўжо разышліся.
   – Жалезная жаба, – зарагатала самая насмешлівая.
   – А мы мяккія жабкі. Зялёныя.
   – Жалезная! Гы-гы-гы!
   Чарапаха пачала крыўдаваць:
   – Кожная жывёла – розная. А я – карысная.
   – I мы кар-рысныя... А ў цябе голасу няма... Кар-рычневая...
   – Жаба ў танку, – пажартавала насмешніца.
   Пакрыўдзілася бедная Чарапаха, нырнула і паплыла ў пратоку, а пасля ў сваю азярынку. А жабы, гледзячы на яе бурбалкі, зноў завялі сваю валынку з катрынкай :

– Бур-ракоў не было –
Бр-ручкі навар-рыла...


   ...Ну і што? I ці добра гэта атрымалася? Тут сабе жабкі весела спяваюць дурныя словы добрымі галасамі. А там Чарапаха, што не мае голасу, але ведае добрыя словы, ляжыць сабе пад вадой, пад святлом месяца, пакрыўджаная і адна-адзінюсенькая.
   I нашто, калі ты зялёны і мяккі, лаяць таго, хто карычневы і цвёрды? Ты вось ходзіш на дзвюх нагах, а кот – на чатырох. I няхай сабе.
   Дрэнна вы зрабілі, жабы. Ану, марш адразу ж у Чарапахі прабачэння прасіць, перапрашаць яе!

Комментарии (0)

Нет комментариев. Ваш будет первым!