Найти на сайте: параметры поиска

Увага!!! Невялікія апавяданні і вершы пададзены ў поўным варыянце.

Набыць беларускія кнігі можна на сайце halijafy.by

Электронныя версіі беларускіх кніг на сайце kniharnia.by, для дзетак chitaemdetyam.com

  Калі верш не бачны на экране смартфона, павярніце экран гарызантальна

Если стихотворение не отображается на экране смарфона, раверните экран горизонтально.



Васіль Зуёнак - Тры вышыні...

Кнопка отправить на печать

Тры вышыні,

     тры сілы знаю ў лесе:

З камлёў – сталёвая,

дзе мох бароды звесіў;

Другая –

песняй звонкай –

     пасярэдзіне,

Дзе сонца захлынаецца ад медзі;
А ля аблок –

у гойданцы зялёнай –

Жыцця пачаткі

правяць цуд штодзённы…

З камлёў тугіх

спрадвек вянцы вязалі,

З балоняў

звонкія цымбалы выразалі,

Ўзляталі думкай да вяршынь

паэты –

Пазнаць

імгнення і жыцця

     сакрэты…

Такім я знаў цябе…

А тут жахнуўся:

Не ўцяміў – дзе я…

     І не ўцямлю, мусіць:

Рабрыстыя – ў падсочках,

     нібы здані, –

О сосны,

хто прыдумаў вам Майданак?!

Хто цвёрдаю рукой падрэзаў жылы,
Жывіцу цягне з вас –

жывую сілу?..

Знайду!

І перад вашым, сосны, вечам,

На тым судзе –

лясным і чалавечым –

Спытаю гнеўна –

     хай адказ трымае:

Чаму

     дух смольны з нашых хат знікае

І гніль вянцы бярэ?

     І гэтак вяла

І глуха так 

     чаму пяюць цымбалы?

Чаму ў паэтаў паніжэлі думы,
Не вырвуцца ніяк з пустога тлуму?..
І калі ён змаўчыць,

     дык вы – крычыце!

Крычыце, сосны,

     сосны, не маўчыце…


1965

 

Крыніца: Зуёнак В. Выбраныя творы. Уклад., камент. аўтара; прадм. Н. Заяц. – Мінск : Кнігазбор, 2010. – 512 с. («Беларускі кнігазбор»: Серыя 1. Мастацкая літаратура).

Комментарии (0)

Нет комментариев. Ваш будет первым!